મોહમ્મદ શમી ઇંગ્લેન્ડ સામેની ટેસ્ટ ટીમ માંથી થઇ શકે છે બહાર જાણો કારણ

મોહમ્મદ શમી ઇંગ્લેન્ડ સામેની ટેસ્ટ ટીમ માંથી થઇ શકે છે બહાર જાણો કારણ

ભારત અને અફઘાનિસ્તાન વચ્ચે ત્રણ મેચની T20 ઈન્ટરનેશનલ સીરીઝ બાદ ભારતે ઈંગ્લેન્ડ સામે પાંચ ટેસ્ટ મેચની સીરીઝ રમવાની છે. આ સીરીઝ માટે ટીમ ઈન્ડિયાની હજુ સુધી જાહેરાત કરવામાં આવી નથી. આ સીરીઝ પહેલા ટીમ ઈન્ડિયાને મોટો ફટકો પડતો હોય તેમ લાગી રહ્યું છે. ફાસ્ટ બોલર મોહમ્મદ શમીને લઈને એક અપડેટ છે કે તેની ઈજાને કારણે તે ઈંગ્લેન્ડ સામેની આગામી ટેસ્ટ શ્રેણીની બે મેચમાંથી બહાર રહી શકે છે. તમને જણાવી દઈએ કે, ભારત અને ઈંગ્લેન્ડ વચ્ચે સીરીઝની પ્રથમ મેચ 25 જાન્યુઆરીથી રમાવાની છે.

ઈન્ડિયન એક્સપ્રેસના અહેવાલ મુજબ, ફાસ્ટ બોલર મોહમ્મદ શમી ઈંગ્લેન્ડ સામે 25 જાન્યુઆરીથી શરૂ થનારી ટેસ્ટ શ્રેણીની પ્રથમ બે ટેસ્ટ મેચ ચૂકી શકે તેવી શક્યતા છે કારણ કે તેણે પગની ઘૂંટીની ઈજા બાદ બોલિંગ ફરી શરૂ કરી નથી. રિપોર્ટ અનુસાર, બોર્ડના એક સભ્યએ નામ ન આપવાની શરતે કહ્યું, “શમીએ હજુ બોલિંગ પણ શરૂ કરી નથી, તેણે પોતાની ફિટનેસ સાબિત કરવા માટે NCA જવું પડશે. ઈંગ્લેન્ડ સામેની પ્રથમ બે ટેસ્ટ મેચમાં તેનું રમવું શંકાસ્પદ છે.” એવું લાગે છે.”

મોહમ્મદ શમીને દક્ષિણ આફ્રિકા સામેની ટેસ્ટ શ્રેણી માટે પસંદ કરાયેલી ટીમમાં સામેલ કરવામાં આવ્યો હતો, પરંતુ તેની ઉપલબ્ધતા ફિટનેસ પર નિર્ભર હતી. જોકે, શમી આ સિરીઝ માટે ફિટ નહોતો અને તેની જગ્યાએ અવેશ ખાનની પસંદગી કરવામાં આવી હતી.

જો અહેવાલો પર વિશ્વાસ કરવામાં આવે તો, BCCI શમીની વાપસી માટે ઉતાવળ કરશે નહીં કારણ કે પાંચ મેચની ટેસ્ટ શ્રેણી ઘરઆંગણે રમાઈ રહી છે અને મોહમ્મદ સિરાજ અને જસપ્રિત બુમરાહ ઉપલબ્ધ રહેશે. ભારતીય પીચો પર સ્પિન બોલરોની ભૂમિકા મહત્વની રહેશે, આવી સ્થિતિમાં ઝડપી બોલરોના સંપૂર્ણ સેટની જરૂર રહેશે નહીં.

તમને જણાવી દઈએ કે, મોહમ્મદ શમીએ ICC ODI વર્લ્ડ કપ 2023માં ભારત માટે શાનદાર પ્રદર્શન કર્યું હતું. મોહમ્મદ શમીએ ટૂર્નામેન્ટની 7 મેચમાં 24 વિકેટ લીધી હતી. જોકે, આ ટૂર્નામેન્ટ દરમિયાન તેને પગની ઘૂંટીમાં તકલીફ થઈ હતી અને તેણે ટૂર્નામેન્ટ દરમિયાન દુખાવા માટે ઈન્જેક્શન લીધા હતા. મોહમ્મદ શમી વર્લ્ડ કપ બાદથી એક્શનથી દૂર છે.